Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) Մշտադիտարկման (մոնիտորինգի), Կառավարման և Ընթացիկ հարցերի հանձնաժողովների նիստերը կանցկացվեն հեռավար ձևաչափով: Հանձնաժողովների նիստերը տեղի կունենան փետրվարի 10-ին և 11-ին:

Ընթացիկ հարցերի հանձնաժողովի նիստի ընթացքում կքննարկվի «ԼԳԲՏ անձանց պաշտպանությունը խտրականության և օրեցօր աճող ատելության խոսքի համատեքստում. տեղական և տարածքային իշխանությունների դերակատարությունն ու պատասխանատվությունը» թեմայով զեկույցը:

Կառավարման հանձնաժողովի օրակարգում է «Տնային՝ հեռավար հարթակներ. մարտահրավերներ և հնարավորություններ քաղաքապետարանների համար» թեմայով զեկույցը: Հանձնաժողովի օրակարգում են նաև 5 այլ զեկույցներ՝ «Տարածքային համերաշխություն. ռեգիոնների դերը», «Համայնքային ծառայողի ապագա դերակատարությունը»,«Խորհրդակցական ժողովրդավարությունը տեղական և տարածքային մակարդակում» և այլն:

Մշտադիտարկման՝ Մոնիտորինգի հանձնաժողովը կքննարկի երկու զեկույց՝ «Կոնգրեսի՝ Տեղական ինքնակառավարման եվրոպական խարտիայի և ընտրությունների դիտորդական առաքելությունների գնահատումների հիման վրա արձանագրված խնդիրները» և «Խորը ճգնաժամային իրավիճակներում Տեղական ինքնակառավարման եվրոպական խարտիայի դրույթների ապահովումը» թեմաներով: Ընթացքի մեջ են Բուլղարիայի և Նիդերլանդների մոնիտորինգային զեկույցների պատրաստման աշխատանքները, Ադրբեջանում տեղական ժողովրդավարության հեռավար մշտադիտարկումը և այլ հարցեր: