Արդեն ավանդական դարձած ԵՄ Կայուն էներգիայի շաբաթն (EU Sustainable Energy Week) այս տարի անցկացվեց հունիսի 11-ից 13-ը՝ «Նվազագույն արտանետումներով էներգետիկ լուծումներ մրցունակ Հայաստանի համար» խորագրով:

Սևան համայնքը 4-րդ անգամ միացավ Կայուն էներգիայի շաբաթվան` ԵՄ «Քաղաքապետերի դաշնագիր՝ Արևելք» ծրագրի ներքո:

Էներգիայի շաբաթվա թեմային համահունչ նախապատրաստվել և անցկացվեցին մի շարք միջոցառումներ , որոնց մեկնարկը տրվեց մայիսի 27-ին:

«Սևան» ազգային պարկ» ՊՈԱԿ-ի այցելուների կենտրոնում ցուցադրվեց «Սիսակը, Միսակը ու կլիմայի փոփոխությունը» և «Սիսակն ու Միսակը շարունակում են հարմարվել կլիմայի փոփոխությանը» ֆիլմերը, որն ուղեկցվեց Գեղագիտական դաստիարակության ազգային կենտրոնի Սևանի մասնաճյուղի սաների նկարչական աշխատանքների ցուցադրությամբ:

Սևանի թիվ 2 «Զարթոնք» մսուր-մանկապարտեզում փոքրիկների հերթական օրն անցավ Կայուն էներգիայի շաբաթվա շրջանակներում կազմակերպված սպորտլանդիայի անցկացմամբ:

Սևանի Հովհ. Այվազովսկու անվան արվեստի դպրոցում թեմատիկ նկարչական աշխատանքների ցուցահանդեսը ևս մեկ հնարավորություն էր՝ բացահայտելու երեխաների թեմատիկ ընկալումները:

«Նկուղ» նորարարական հարթակում «Չվերականգնվող թե կայուն էներգիա» թեմայով բանավեճ-քննարկումը մի հարկի տակ էր հավաքել երիտասարդներին, որոնք ոչ միայն ներկայացրին իրենց դիտարկումները, այլ նաև հանդես եկան առաջարկություններով:

«Նկուղ» նորարարական հարթակում տեղի ունեցավ ևս մեկ միջոցառում. թղթի, պլաստիկի վերամշակման վարպետաց դասը համախմբեց պատանիներին և երիտասարդներին, որոնք հաճելին և օգտակարը համատեղեցին, իսկ վերջում կատարված աշխատանքների ցուցադրությամբ ամփոփեցին օրը:

Լճաշեն բնակավայրի «Մանչուկ» մանկապարտեզում հերթական զրույց-պարապմունքը թեմատիկ էր, որը կրում էր «Արևն ու կայուն էներգիան» խորագիրը:

Պարապմունքների շարքը լրացվեց Սևանի թիվ 1 «Բողբոջ» մսուր-մանկապարտեզում, որտեղ անցկացվեց «Կանաչ էներգիան բնության մեջ» թեմայով բաց պարապմունք:

Լճաշեն բնակավայրի արվեստի դպրոցի սաները այցելուներին և հյուրերին դիմավորեցին «Կանաչ աշխարհ» խորագրով ցուցահանդեսով, որն ուղեկցվեց «Մենք և բնությունը» խորագրով ցերեկույթով:

Սևանի Ս. Զաքարյանի անվան մշակույթի պալատի հարակից տարածքում Կայուն էներգիայի շաբաթվա հերթական օրն ամբողջացվեց ֆլեշմոբով: Մշակութային կենտրոնի սաները «Արևային աշխարհ» խորագրով ֆլեշմոբին մասնակից դարձրին նաև համաքաղաքացիներին:

Սևանի թիվ 4 «Գալիք» մսուր-մանկապարտեզում երեխաների պարապմունք – զրույցի թեման բնապահպանական էր, որը կրում էր «Պահպանենք մեր մոլորակը» խորագիրը:

Շաբաթվա հաջորդ միջոցառման հասցեն Սևանի թիվ 3 «Հեքիաթ» մանկապարտեզն էր, որտեղ տեղի ունեցավ սպորտլանդիա:

Սևան քաղաքից մեկնարկած հեծանվարշավը վերջնագիծը հատեց Գագարին բնակավայրում: Պատանի հեծանվասերները ևս մեկ անգամ հիշեցրին ու կարևորեցին կայուն էներգիայի նշանակությունը, բնապահպանական խնդիրները:

«Նվազագույն արտանետումներով էներգետիկ լուծումներ մրցունակ Հայաստանի համար» խորագրով նկարչական աշխատանքների մրցույթին ներկայացվեց 62 աշխատանք, որոնք ամփոփվեցին ստեղծված հանձնախմբի կողմից:

Մրցանակակիրներ դարձան Մանե Ղարիբյանը (12 տարեկան), Ջուլիետա Մուրադյանը (13 տարեկան), Սյուզի Մանուկյանը (12տարեկան), ամենաշատ հավանումների արժանացավ Մանե Ալավերդյանի աշխատանքը (480հավանում):

«Նվազագույն արտանետումներով էներգետիկ լուծումներ մրցունակ Հայաստանի համար» խորագրով լուսանկարչական աշխատանքների մրցույթին ներկայացված 15 աշխատանքից լավագույնը ճանաչվեցին Արիանա Ղարիբյանի (10 տարեկան), Անուշ Ղազարյանի (11 տարեկան), Վիկտորյա Պետրոսյանի (12 տարեկան) աշխատանքները:

Կայուն էներգիայի շաբաթվա անմիջական մասնակից դարձավ շուրջ 765 երեխա, պատանի, երիտասարդ իսկ բազմաթիվ սևանցիներ վայելեցին շաբաթվա ընթացքում իրականացվող միջոցառումներն ու նախաձեռնությունները: