Հայաստանի համայնքների միությունում տեղի է ունեցել ազգային փոքրամասնություններ ներառող համայնքների ղեկավարների առաջին հանդիպումը:

Վարչատարածքային փոփոխություններից հետո ազգային փոքրամասնությամբ համայնքները գործում են մյուս համայնքներից էականորեն տարբերվող օրենսդրական, կառավարման, ֆինանսական և մարդկային միջոցների պայմաններում: Առկա են դոնորական և պետական միջոցների հասանելիության խնդիրներ, ինչպես նաև այս խմբի համայնքների ինտեգրվածության ու ներգրավվածության ապահովմանն առնչվող հարցեր:

Հայաստանի համայնքների միության նախագահ Էմին Երիցյանը հանդիպման ընթացքում ներկայացրել է նոր ընտրված համայնքների ղեկավարներին: Դիտարկվել են նաև ազգային փոքրամասնություններով համայնքների շահերը, պետական ծրագրի և սուբսիդավորման ծրագրերի հասանելիությունը: Քննարկում է ծավալվել ազգային փոքրամասնություններով համայնքներում պետական միասնական ծրագրի անհրաժեշտության ուղղությամբ, դիտարկվել են նաև միջազգային գրանտային ծրագրերին մասնակցության հնարավորությունները, համայնքների արտաքին կապերի զարգացման հեռանկարները: Հանդիպման ընթացքում Էմին Երիցյանը կարևորել է Միության կանոնադրական և կառուցվածքային փոփոխությունների շրջանակներում ազգային փոքրամասնությամբ համայնքների ներկայացվածության ապահովման հարցը: Միության նախագահը նաև վստահեցրել է, որ Միությունը հետագայում ևս պատրաստ է ծրագրային և խորհրդատվական աջակցություն տրամադրել համայնքներին: