Եվրոպայի խորհրդի տեղական և տարածքային իշխանությունների կոնգրեսի (ԵԽ կոնգրես)  պատվիրակությունը՝ զեկուցող և Վենետիկի հանձնաժողովի Ժողովրդավարական ընտրությունների խորհրդի գծով Կոնգրեսի ներկայացուցիչ Ստյուարտ Դիքսոնի (Միացյալ Թագավորություն, ILDG) գլխավորությամբ դեկտեմբերի 2-3-ին կիրականացնի Հայաստանում դեկտեմբերի 5-ին նախատեսված Տեղական ինքնակառավարման մարմինների (ՏԻՄ) ընտրությունների գնահատման առաքելություն:

Մինչև ընտրությունների օրը կկազմակերպվեն առցանց ճեպազրույցներ ՀՀ ԿԸՀ նախագահ Տիգրան Մուկուչյանի, ՀՀ տարածքային կառավարման և ենթակառուցվածքների նախարար Գնել Սանոսյանի և նախարարի տեղակալ Վաչե Տերտերյանի, Հայաստանի համայնքների միության նախագահ Էմին Երիցյանի հետ:

Նաև նախատեսված են տեսահանդիպումներ ԵԽ Կոնգրեսում հայկական պատվիրակության անդամների, տեղական և միջազգային ՀԿ-ների, ՏԻՄ ընտրություններին մասնակցող տարբեր քաղաքական ուժերի թեկնածուների, լրատվամիջոցների ներկայացուցիչների հետ: Ընտրությունների հաջորդ օրը առցանց համակարգով կկազմակերպվի ճեպազրույց ՏԻՄ ընտրությունների դիտորդների հետ: