Էջմիածին համայնքի ղեկավար Դիանա Գասպարյանը պարգեւատրեց «ԵՄ կայուն էներգիայի շաբաթ-2020»-ի շրջանակում հայտարարված նկարչական եւ լուսանկարչական մրցույթների հաղթողներին:

«Ճգնաժամից դուրս՝ մաքուր էներգիա կանաչ վերականգնման եւ աճի համար» խորագրով նկարչական մրցույթի hամար ստացված բազմաթիվ հայտերից ժյուրին որպես հաղթող ընտրել է Եղիշե Թադեւոսյանի անվան գեղարվեստի դպրոցի սան 11-ամյա Սոֆյա Սահարյանի «Մաքուր միջավայր» աշխատանքը: Նա ստացավ Եվրամիության հատուկ մրցանակը եւ անակնկալ նվեր քաղաքապետի կողմից։ 

«Կանաչ զարգացում» խորագրով լուսանկարների մրցույթի համար պարգեւատրվեց Վազգեն Ենոքյանը։ Բոլոր մասնակիցները ստացել են մասնակցության հավաստագրեր եւ խրախուսական նվերներ։ 

«ԵՄ կայուն էներգիայի շաբաթ-2020»-ի շրջանակում Էջմիածնի քաղաքապետարանի եւ Հայաստանի համայնքների միության գործակցությամբ եւ «Քաղաքապետերի դաշնագիր՝ Արևելք» ծրագրի ներքո կազմակերպված մրցույթների նպատակն էր բնակչության իրազեկվածության բարձրացումը էներգաարդյունավետության, վերականգնվող էներգիայի, էներգետիկ եւ կլիմայական փոփոխությունների միջեւ կապերի մասին։