Ապրիլի 2-ին Ստրասբուրգում մեկնարկեց Եվրոպայի խորհրդի Տեղական և տարածքային իշխանությունների կոնգրեսի 36-րդ նստաշրջանը: Կոնգրեսի աշխատանքներին մասնակցում է հայկական պատվիրակությունը՝ Հայաստանի համայնքների միության նախագահ Էմին Երիցյանի գլխավորությամբ:

Նստաշրջանն անցկացվում է «Քաղաքապետերը՝ ժողովրդավարության երաշխավոր» խորագրով: Կոնգրեսի լիագումար նիստի ընթացքում կանցկացվի այս թեմայով քննարկում: Կոնգրեսին կհյուրընկալվի Ֆինլանդիայի կապի և հաղորդակցության նախարար Աննա Բերները, Ֆինլանդիայի՝ Նախարարների կոմիտեում նախագահության անունից: Կոնգրեսում ելույթ կունենան ԵԽ գլխավոր քարտուղար Թորբյորն Յագլանդն ու ԵԽԽՎ նախագահ Լիլիան Մորի Պասկիեն: Կոնգրեսի ուշադրության կենտրոնում կլինեն քաղաքապետերի դեմ ճնշումները: Այս թեմայով նախատեսված են մի շարք քննարկումներ:

Ապրիլի 2-4-ին Կոնգրեսը նստաշրջանի աշխատանքների ընթացքում կքննարկի հարցեր, որոնք վերաբերում են համայնքների՝ քաղաքային-գյուղական բաժանմանը, համայնքների ֆինանսավորման խնդիրներին, համայնքային ծատայողների էթիկական հարցերին, տեղական և տարածքային ընտրված ներկայացուցիչների ֆինանսական փոխհատուցմանն և անկախության հարցին: