Հունիսի 26-30-ը «Քաղաքապետերի դաշնագիր՝ Արևելք» ծրագրի ներքո անցկացվում է Հայաստանի համայնքների պատվիրակության ուսուցողական այցը Մոլդովա։

Այցելության առաջին օրը հայկական պատվիրակության անդամներն այցելել են Քիշնևի քաղաքապետարան։

Հայաստանյան պատվիրակության կազմում են Երևանի քաղաքապետարանի անձնակազմի Զարգացման և ներդրումային ծրագրերի վարչության պետ Արմեն Հարությունյանը, Ալավեդրի համայնքի ղեկավարի տեղակալ Արտուշ Աբելյանը, Մարտունի համայնքապետարանի աշխատակազմի զարգացման ծրագրերի, տուրիզմի, առևտրի սպասարկման և գովազդի բաժնի գլխավոր մասնագետ, տնտեսական զարգացման պատասխանատու Վարազդատ Մհերյանը, Գյումրու համայնքապետարանի աշխատակազմի բնակկոմունալ և շրջակա միջավայրի պահպանության բաժնի գլխավոր մասնագետ Արտուշ Ավագյան, Վանաձորի համայնքապետարանի  աշխատակազմի բնակկոմունալ և շրջակա միջավայրի պահպանության բաժնի գլխավոր մասնագետ Մամիկոն Մխիթարյանը և ԵՀ «Քաղաքապետերի դաշնագիր՝ Արևելք» ծրագրի փորձագետ Հայաստանում Արտեմ Խարազյանը։

Քիշնևի քաղաքապետարանում հանդիպման ընթացքում հայկական պատվիրակության անդամները ծանոթացել են էներգաարդյունավետության ոլորտում վերջին 4 տարիների ընթացքում համայնքապետարանի իրականացրած ծրագրերին։

Քիշնևի քաղաքապետի տեղակալ Իլյա Չեբանը հայտնել է, որ քաղաքային իշխանությունները վերանայել են իրենց էներգետիկ առաջնահերթությունները և ակտիվացրել համայնքային ենթակայության հաստատությունների էներգաարդյունավետության բարձրացմանն ուղղված գործողությունները, ինչպես նաև քայլեր են ձեռնարկվել արևային կայանների տեղադրման հարցով։

Տրանսպորտի ոլորտում ևս արդիականացում է կատարվել․ մասնավորապես քաղաքը ձեռք է բերել էներգաարդյունավետ ավտոբուսներ և տրոլեյբուսներ, ինչպես նաև բացվել են նոր երթուղիներ։

ՀՀ համայնքների ներկայացուցիչները նաև այցելել են Քիշնևը սպասարկող ջրամատակարարող ընկերություն։

Ուսուցողական այցի հիմնական նպատակն է ամրապնդել համայնքների կարողությունները Դաշնագրի շրջանակներում կայուն էներգետիկ զարգացման և կլիմայի պահպանության գործողությունների ծրագրերի մշակման գործում՝ ԱլԳ տարածաշրջանում գործընկերների փորձի ուսումնասիրության միջոցով: