Տեղական իշխանությունների զսպվածությունն ու էթիկական վարքագծի վերանայումը՝ Կոնգրեսի ուշադրության կենտրոնում

07.11.2018

Ստրասբուրգում Եվրոպայի խորհրդի տեղական և տարածքային իշխանությունների կոնգրեսի 35-րդ լիագումար նստաշրջանը քննարկեց տեղական մակարդակում ընտրված ներկայացուցիչների զսպվածությանն ու էթիկական վարքագծին առնչվող հարցեր:

Զեկույցը ներկայացրեց Իտալիայի պատվիրակության ներկայացուցիչ Մանուելա Բորան: Հառնելով, որ կոռուպցիան իր տարբեր դրսևորումներով ներկայումս պառնալիք է ժողովրդավարության, տնտեսական զարգացման և սոցիալական համախմբվածության համար՝ Կոնգրեսը սահմանում է էթիկական վարքագծի հիմնական սկզբունքներ և չափանիշներ բոլոր այն անձանց համար, որոնք ներգրավված են տեղական և տարածքային կառավարման համակարգում:

Մանուելա Բորան հայտարարեց՝ վարքածի կանոնակարգի վերանայումը երկու նպատակ ունի՝ ընդլայնել կանոնակարգի կիրառումը և հաշվի առնել տեղական մակարդակում վերջին երկու տասնամյակներին տեղի ունեցած ամենակարևոր զարգացումները: Օրինակ՝ թվայնացում և հաղորդակցության նոր ձևերը և այլն:

Ըստ պատվիրակի՝ վարքագծի կանոնակարգի այս նոր մոդելը, նոր չափանիշները կնպաստեն տեղական և տարածքային մակարդակում ընդհանուր վստահության մթնոլորտի ստեղծմանը:

Մանուելա Բորան նոր կանոնակարգի ընդունումը համարեց կարևոր քայլ: Ամփոփելով նշեց. «Ներկայումս քաղաքացիներն ավելի բծախնդիր են դարձել՝ տեղական իշխանությունների ներկայացուցիչներից պահանջում են ավելի մեծ թափանցիկություն և հաշվետվողականություն: Կանոնակարգի այս փոփոխություններն անելով՝ մենք կկարողանանք ապահովել տեղական իշխանությունների՝ նշված պահանջների բավարարումն ու հասարակության շրջանում վստահության մթնոլորտի ձևավորումը»: