Հունիսի 19-ին ԵՀ «Ուսումնասիրությունների միավորված կենտրոնը» (Joint Research Center) հաստատել է Տաշիր համայնքի Կայուն էներգետիկ զարգացման և կլիմայի պահպանության գործողությունների ծրագիրը (ԿԷԶԿՊԳԾ):

Տաշիրի համայնքապետարանին հասցեագրված պաշտոնական գրությամբ, Կենտրոնը տեղեկացրել է համայնքին, որ ԿԷԶԿՊԳԾ-ն համապատասխանում է Դաշնագրի հիմնական պահանջներին, ինչպես նաև ներկայացրել գործողությունների ծրագրի վերլուծության արդյունքները (Feedback Report), որում ամփոփված են փաստաթղթի հետագա բարելավմանն ուղղված մի շարք մեկնաբանություններ և առաջարկություններ:

Տեղեկացնենք, որ Տաշիրը ՀՀ-ում երկրորդ համայնքն է, որի՝ մինչև 2030թ. գործողությունների ծրագիրը հաստատվեց Կենտրոնի կողմից:

ԿԷԶԿՊԳԾ-ն մշակվել է համայնքապետարանի կողմից՝ Հայաստանում «EU4Energy» նախաձեռնության շրջանակներում իրականացվող «Քաղաքապետերի դաշնագիր՝ Արևելք» տարածաշրջանային ծրագրի և Հայաստանում ՄԱԶԾ Կլիմայի փոփոխության ծրագրերի աջակցությամբ: Այնուհետև փաստաթուղթը հաստատվել է համայնքի ավագանու կողմից 2020թ. դեկտեմբերի 25-ին (Որոշում N96-Ա) և ներկայացվել ՈՒՄԿ-ին «MyCovenant» առցանց հարթակի միջոցով:

Փաստաթուղթը հասանելի է համայնքապետարանի կայքում՝ «Զարգացման ծրագրեր» բաժնում:

«Քաղաքապետերի դաշնագիր՝ Արևելքը» ԵՄ-ի կողմից ֆինանսավորվող ծրագիր է, որի նպատակն է ներկայացնել և աջակցել ԵՄ-ի այս կլիմայական և էներգետիկ նախաձեռնությունը Արևելյան գործընկերության երկրներում: Ծրագիրն աջակցում է տեղական իշխանություններին կայուն էներգետիկ քաղաքականության իրականացման, էներգետիկ անվտանգության ապահովման և կլիմայի փոփոխության մեղման և հարմարվողականության գործում:

«Քաղաքապետերի դաշնագիր՝ Արևելք» ծրագրի աջակիցն ու հայաստանյան գործընկերն է Հայաստանի համայնքների միությունը։

Ներկայումս Հայաստանում Դաշնագրին անդամակցում է 30 համայնք, որոնցից 12-ն արդեն մշակել են իրենց գործողության ծրագրերը: